வாழும் வழி....!

நடந்ததை நினைத்து வருந்தாமல் - இனி 

நடப்பதில் கவனம் செலுத்தி விடு 

உடைந்த பாத்திரம் ஒட்டுமுன்னம் - நல்ல 

உயரிய பாத்திரம் படைப்பது மேல் 

 இடரினைக் கண்டு அஞ்சாது - அதை 

இதய பலத்துடன் எதிர் கொள்ளு 

இறைவனைத் துதித்துக் கண்ணியமாய் - தினம் 

கடமையைச் செய்து உயர்வடைவாய்.....!

போன "பொழுதுகள்" - திரும்பாது என்றும் 

பொய்களும் நிலைத்து வாழாது 

மானங்காத்து வாழ்பவரை - இங்கு 

மன்பதை என்றும் மறக்காது 

தேனாய் வாழ்வை அமைப்பதற்கு - நிதம் 

திடமே வேண்டும் நெஞ்சத்தில் 

வானும் மண்ணும் நம் சொந்தம் - என்று 

வாழ்ந்தால் இன்பம் உலகுய்யும்.....!

சாதிபேதம் தொலைத்தே தான் - நல்ல 

சமத்துவம் வளர்த்தல் பணியாகும் 

நீதி நேர்மை செயல்நுட்பம் என்றும் 

நெஞ்சில் அன்பு தனை வளர்த்து 

மேதினிதன்னில் ஒற்றுமையாய் - நல்ல 

மிடுக்கை வாழ்வது வாழ்வாகும் 

சாதனை வேண்டும் வாழ்க்கையிலே - வரும் 

சந்ததி வாழ்த்த வாழ்த்திடனும்.....!