ஒற்றுமை.....!

இதயத்தில் இருள் தன்னைக் களைந்தெடுத்து - நல்ல

இசை தரும் வீணையாய்க் குடைந்தெடுத்து 

உதயத்தில் பூபாளம் மீட்டிடுவேன் - உன் 

உயர்வுக்கு நல்வழி காட்டிடுவேன்......!

தீமையை முளையிலே தீயிடுவேன் - எந்த 

தீயவர் வாழ்க்கையையும் திருத்திடுவேன் 

ஆமை போல் அமைதியாய் வாழச் சொல்வேன் - நெஞ்சில் 

ஆறுதல் வார்த்தைகள் கூறி வெல்வேன்......!

பேசும் மொழி உயிர் மூச்சு என்பேன் - மனிதர்க்குள் 

பேதைமை பாராதார் உயர்ந்தோரென்பேன் 

கூசும் நா வேற்றுமை கூறி நின்றால் - மனிதா 

கூடி நாம் வாழ்ந்தா லோர்குறை வருமோ.....?

எல்லா குருதிகளும் ஒரு நிறமென்பேன் - அவற்றை 

இறைவனும் ஒன்று என்பேன் 

இல்லை என்றால் தெய்வம் இவ்வுலகிலில்லை - மனிதா 

அல்லாஹ் துணையின்றி ஏதுமில்லை.....!

ஜாதிகள் ஆண்  பெண் இரண்டு என்பேன் - இங்கு 

யாவரும் சரி சம மாந்தரென்பேன் 

நீதி நிலை கெட்ட மனிதர்களை - கண்டு 

நெஞ்சமே நெருப்பாக வேகுதடா....!

ஏழையர் யாவரென் உடன் பிறப்பே - அவர் 

ஏற்றம் காண சேவை செய் திடுவேன்....!

கோழையாய் வாழ்வதை நான் வெறுப்பேன் - அவர் 

குறுக்கு வழி சென்றால் நான் தடுப்பேன்....!

அன்பு தான் என் மனச் சாந்தி யென்பேன் - அதை 

இதயத்தில் வைத்து நான் பேணிடுவேன்

பண்பான மாந்தரை வரவழைபேன் - கவி 

பாவாலே அவர் வாழ வாழ்த்துரைப்பேன்.....!  

கலைந்தோடும் நெஞ்சங்கள் துணையிருப்பேன் 

நிலையில்லா வாழ்வில் நான் நிறைந்திருப்பேன் - எந்த 

நிலை வந்த போதும் நான் - வாழ்வில் 

செய்ந் நன்றி மறவாமல் வாழ்ந்திருப்பேன்.....!

கூடாதே கூடாத கூட்டத்திலே - உன் 

குணம் கெட்டுப்போகும் அக் கூட்டத்தினால் 

நாடாதே மது மாது சூது கொலை தன்னை - அவை 

நாளெல்லாம் உன் வாழ்வை அழித்தொழிக்கும்....!

கண் முன்னே கயவரைக் கண்டேனென்றால் - நான் 

காறியவர் முகத்தின் முன் உமிழ்ந்திடுவேன் 

என் மனத் தோட்டத்தில் ஏங்குகிறேன் - நாட்டில் 

இன மூன்றும் ஒற்றுமை காண்பதென்று......?

பொல்லாத காலமினி மாற வேண்டும் - அதில் 

போலிகளும் புரட்டல்களும் ஒழிய வேண்டும் 

இல்லாமை நிலை முற்றாய் மாற வேண்டும் - பொருள் 

இருப்பவர் இல்லாருக்கு ஈய வேண்டும்.....!

இந்த நாட்டில் எல்லோரும் வாழ வேண்டும் - இங்கே 

இன மூன்றும் ஒற்றுமை காண வேண்டும் 

வன்முறையால் நன்மைகள் சேர்க்கலாமோ? - நல்ல 

வழி கண்டு அமைதி நிலை நாட்டலாமே.....!