ஓர் ஒற்றைக் குயிலின் ஓலம்.....!

சோலையிலே ஓர் ஒற்றைக் குயில் 

சோகக் குரலிலே கூவுதடி 

மாலையிலும் அதிகாலையிலும் - அது 

வாடி மனம் வெந்து கூவுதடி.....!

சின்னஞ் சிறு பராயத்திலே 

சேர்ந்த துணை மறைந்தோடியது 

வண்ணக் கருங்குயில் தன்துணையை - கிட்டே 

வாவென்ற ழைத்துமே கூவுதடி.....!

கொஞ்சிக் கலந்துமே மாமரத்தில் 

கூடித் துளிர் கொய்து பாடியதும் 

நெஞ்சிற் கனவுகள் கூடிடவே - அன்று 

நித்தம் குளிர்ந்ததை எண்ணுதடி.....!

சோலையிலே பறந்தோடிய தும் 

சொர்க்கமென ஓன்று கூடியது 

பாலையருந்திப் பழஞ்சுவைத்தே - காதற் 

பாடலிசைத்ததைக் கூவுதடி.....!

சொந்த அனுபவம் யாவு மின்று 

சொப்பன மாகவே போன தெண்ணி 

வெந்து மிக நொந்து கூவுதடி - அதன் 

வேதனை என்று தான் தீருமடி......?