அண்ணலை நினைத்து வாழ்வோம்....!

சிலைகளை வணங்கி மாந்தர் - அன்று 

சீரழிவுற்றார் என்றோ 

மலையொளிர் நிலவாய் எங்கள் - தூய 

மா நபி வந்தார் மண்ணில்.....!

அறிவினை மறந்தே அன்று - பெண்ணை 

அழித்தனர் சிசுவில் கொன்று 

நெறியுயர் தீனைக் கொண்டே - நபி 

நிலத்தினை வளர்த்தார் நன்றே.....!

இஸ்லாம் என்னும் தூய - இறை 

நிதியினை மண்ணுக் கீந்து 

ஜாஹிலியர் செய்தீமை - கொடும் 

அனலினை அணைத்தார் தாமே.....!

தொல்லைகள் கடலின் மேலாய் - இங்கு 

துலங்கியே நின்ற காலை 

எல்லையில்லாத இன்ப - உயர் 

இஸ்லாம் தனை விதித்தார்.....!

மண்ணிலே இஸ்லா மென்னும் - எங்கள் 

மாமறை வளர்த்த செம்மல் 

அண்ணலார் நபியை நாமும் - இங்கு 

அனுதினம் நினைத்து வாழ்வோம்.....!